ઝળહળતી રોશનીમાં કોઈની આંખોની અંદર તમે સપના જોયા છે? ભીડની વચ્ચે કેટલાક એવા માણસો પણ હોય છે, જે એ ભીડનો હિસ્સો જ નથી, જે વિચારોમાં કોઈક બીજી જ દુનિયામાં છે, એ દુનિયા જ્યાં તેઓ પોતાના સપના સાકાર થશે એ કલ્પનામાં જીવે છે. એ વ્યક્તિ, જેની માટે પોતાનાં ઘરનું ગુઝરાન ચલાવવું તેના સપનાઓની આડે આવે છે, તેમ છતાં તે બધી જ જવાબદારીઓ નિભાવીને પણ પોતાની મંઝિલ તરફ પહોંચવા માટે સમય ફાળવે છે અને મહેનત કરે છે. કોઈ એવો દોસ્ત છે તમારે જે તમારી સલામતી માટે ખોટી વાત કબૂલ કરવા તૈયાર થઈ જાય? કે પછી એવો દોસ્ત, જે પોતે હાર્યો છે, છતાં તમારી જીતની ખુશી મનાવે. આંખોમાં માંડ રોકી રાખેલ ગરમ આંસુ જ્યારે બહાર આવે ત્યારે તમને રાહતની લાગણી થઈ છે? પથ્થરોની વચ્ચે ક્યારેય તમને ફૂલો જેવો અહેસાસ થયો છે? વરસતા વરસાદની વચ્ચે કે તમારા હાસ્યની પાછળ પણ તમારી ભીંજાયેલી આંખોને ઓળખી જનાર વ્યક્તિ જો તમારી પાસે હોય તો એ વ્યક્તિ તમારાથી દૂર ન થાય તેની કાળજી જરૂર લેજો.
ઝોયા અખ્તરની આ ફિલ્મ ફક્ત એ લોકોને સમજાશે જેઓની માટે સપના શું છે, સપના પૂરા કરવા માટે કોઈ વ્યક્તિ મહેનત શા માટે કરે છે તેમજ સપના પૂરા કરીને તેને પોતાને કેટલો આત્મસંતોષ થશે, વગેરે બાબતોની પ્રાથમિક સમજ હોય. બાકી તો દરરોજ સવારે સૂર્ય ઊગે જ છે અને આપણી જિંદગી તો અટકવાની નથી જ...
સંબંધિત પોસ્ટ :-
